نجم خافت

لو قطف لي ضيا النجمة ثم قدّمها وسام

وإن جاب القمر فوقه كل أجرام المجرة

ما يكفّر غلطته لو يعتذر ألفين عام

مات عطشان الفلا لو كِسر بالطيش جرّة

الخطا نوعين تُعرف منذُ أن خُلقَ الأنام

ناس تخطي جاهلة .. وناس تتمادى مُصرّة

بعضهم هالكذب طبعه والنجَس به مستدام

ما يهمّه غير نفسه لو على غيره مضرّة

غادِر وخوّان عِشرة .. ماخذٍ طبع اللئام

ايتجنى بدمّ بارد .. ما تحرّك فيه ذرّة

يا طايحٍ بأمثال هذا .. على عمرك سلام

يحترق قلبك رماد .. وينتثر في كل مرة

إن ضويت الدرب شمعة .. يسحبونك للظلام

وإن رضيت تعيش ظَلمَة .. يغدرون بحين غرة

وإن رفضت الظُّلم مرة .. يجرحونك بالخصام

وإن سكتنا عنه؟ جمرة .. تندفن فالصّدر حرّة

ما يطفّيها عتاب .. وما يكفّيها ملام

كافي انك رحت راحل وانهم بالعيب عرّة

اختلاف النظرة اللي في الخيال .. ابلغ كلام

جرح غاير للأبد .. في المحاني مُستَقرَّه

المواقف درس مؤلم .. باطنه بالخير عام

والمصيبة شخص يرحل .. يلحقك لليوم شرّه

ما يهم .. العمر مرة وإن هجع ليلي بنام

وأعتبر ما صار خيرة .. صبرنا لله دُرّه

خطأ فادح واستفدنا .. واعتدل معه القوام

كل ما يطري فذهنك تحمد الله ع المسرّة