يا غارقٍ بأوهام .. وش هي جمايلك؟
بتموت ناقص ما عرفت الجمالة
وش هي المزايا فيك؟ .. عطني فضايلك؟
ماغير تمشي في دروب الحثالة
أزريت فيك ولي زمن بس أحايلك
لين انكشف وجه الغدر والجهالة
تتوهّم الاحسان .. والعيب طايلك
تشرب من خبيث الصفات .. بثمالة
ماعاد ينفع فيك تقويم مايلك
فيك النجاسة عايفتها الشَمَالة
اخطيت رافع قيمتك، كنت شايلك
فوق السحاب .. وعن وحول الضحالة
هذي نتايج طيب ف اللي مثايلك
جاي وتعيّب في الوجع .. وبسفالة؟
لو واحدٍ غيري وجرّب فعايلك
يلعن أبو عشرتك وآخر سلالة
تضرب أمثال الطهر وأنت نايلك
من قليل الأصل .. متردّي خصاله؟
كاذب وجاحد عُرف .. هذي جمايلك؟
رح للكلاب أعطهم .. حقّ الزمالة
ماني على كثر الأذى منك غايلك
حتى شعور الكُره .. تبطي تطاله
مثلي منزّه .. ما تطوله حمايلك
وآطى على عكْف الشوارب .. رَجَالة
خذ ما تبقّى منك .. جمّع زبايلك
واجرَع معَا كاس الجفا .. من غَسَاله
نجم خافت 